Álestur rafmagnsmælis

Dreifiveita skal lesa á mæla hjá almennum notendum að lágmarki fjórða hvert ár. Dreifi­veita skal engu að síður afla upplýsinga um mælistöðu árlega.

Almennum notanda ber að skila árlega til dreifiveitu upplýsingum um mælistöður allra mæla sem skráðir eru í tengisamningi, fari dreifiveita fram á það.

Almennur notandi getur, gegn greiðslu aukagjalds, krafist aukaálestrar og uppgjörs miðað við mælda notkun.

Einnig á að vera hægt að senda inn aukaflestur t.d. ef notkun breytist.

Dreifiveita les á rafmagnsmæli:

• á fjögurra ára fresti í það minnsta eða 
• ef notandi skiptir um raforkusala eða
• ef notandi flytur úr íbúð eða húsi eða
• ef skipt er um rafmagnsmæli.

Raforkan er mæld í rafmagnstöflu sem gjarnan er að finna á jarðhæð eða kjallara húsnæðis.

Dreifiveitur hafa hafið uppsetningu á snjallmælum hjá kaupendum raforku. Snjallmælar mæla notkun raforku í rauntíma. Búast má við breytingum á regluverki um álestur rafmagnsmæla eftir því sem verkefninu vindur fram.

Heimild: Reglugerð nr. 1150/2019 um raforkuviðskipti og mælingar.