Kortasafn Orkustofnunar

Flokkar kortasafns

Kortasafn Orkustofnunar samanstendur annars vegar af kortum sem orðið hafa til í starfsemi stofnunarinnar og hjá forvera hennar Raforkumálaskrifstofunni og hins vegar af kortum sem aflað hefur verið frá ýmsum aðilum hér á landi og erlendis. Safnið hefur til þessa verið óskráð, en samræmd rafræn skráning safnkostsins í kortabrunn OS hófst árið 2008.

Kortasafninu má skipta í fimm meginhluta:

1. Orkugrunnkort, gefin út af Raforkumálaskrifstofunni og arftökum hennar; Orkustofnun, Landsvirkjun og Rarik
2. Jarðkönnunarkort (jarðfræðikort og vatnafarskort), gerð á vegum Orkustofnunar, ÍSOR og Vatnamælinga
3. Teikningasafn OS (Skráð safn Teiknistofu OS 1938-1998)
4. Kort í skýrslum og greinagerðum OS.
   
5. Útgefin kort annarra innlendra og erlendra stofnana og fyrirtækja

KortaSkráning

Unnið er að skráningu orkugrunnkorta og jarðkönnunarkorta (jarðfræði- og vatnafarskorta) í kortabrunn Orkustofnunar. Þar koma fram helstu skráningarþættir sem tengjast kortunum og er mögulegt að samnýta skráningarupplýsingar á milli kerfa. Þegar kort OS hafa verið skráð í kortabrunninn er mögulegt að flytja skrárnar yfir í Oracle gagnagrunn þar sem auðveldara er að samstilla gögn og bæta við ítarlegra efni. Með tengingu á gagnatöflum í Oracle gagnagrunni og staðsetningargögnum í ArcInfo landupplýsingakerfi eru síðan gerðar formskrár til birtingar í Orkuvefsjá (OVS). Þar er nú opið aðgengi að upplýsingum um gögnin og mögulegt að skoða myndir af öllum orkugrunnkortunum. Skráningu orkugrunnkortanna er lokið, unnið er að skráningu jarðfræði- og vatnafræðikortanna, til er eldri skrá yfir teikningasafn, en aðrir flokkar bíða skráningar.